رواية مزرعة الدموع بقلم مني سلامة (كاملة)
فتحدث عمر قائلا
زى ما قولت لحضرتك .. أنا عارف ان الوقت مش مناسب .. بس أنا حابب انى أعرفك وأعرفها برغبتى دى من دلوقتى .. وكمان أهلى جايين بعد كام يوم وحابب ان الأسرتين يتعرفوا على بعض .. لحد ما يبقى الوقت مناسب اننا نعمل خطوبة
صمت قليلا ثم قال
وبعد اذنك أنا عايز خطوبة وكتب كتاب مع بعض .. والفرح هيكون بعدهم بوقت قصير
والله يا بشمهندس أنا اتفاجئت بطلبك .. وأنا عن نفسي مش هلاقى أحسن منك عريس لبنتى .. بس أنا لازم أخد رأيها الأول
قال عمر بسرعه
طبعا يا عم عبد الحميد .. كلمها وأنا منتظر منك الرد ان شاء الله
ابتسم عبد الحميد قائلا فى حبور
اللى فيه الخير يقدمه ربنا
استأذن عمر ثم انصرف .. وجدت العبرات طريقها الى عين عبد الحميد ورفع رأسه وتمتم قائلا
أصلا من ساعة ما دخلت المزرعة وهى مش طايقانى
هتفت ياسمين بهذه العبارة وهى جالسه مع سماح فى بيتها .. قالت سماح
ليه مش طايقاكى
قالت ياسمين پحده
هى كده من الباب للطاق
ثم استطردت قائله
من البداية وهى فاكرة ان فى حاجه بينى وبين البشمهندس عمر
نظرت اليها سماح بخبث قائله
وهو فى حاجه بينك وبينه
سماح
خلاص خلاص كنت بهزر
زفت سماح ثم قالت
بصى سيبك منها .. ولو عملتلك حاجه تانى قولى ل عمر
هتفت ياسمين پحده
أقوله ايه ... أقوله فى واحدة من اللى بيشتغلوا عندك فاكرة ان فى حاجه بينى وبينك !
تمتمت سماح
معاكى حق مينفعش تقوليله كده
ثم نظرت اليها قائله
أمال هتعملى ايه
قالت
ياسمين بحزم
مش هسمحلها تتكلم عنى تانى .. وهوقفها عند حدها .. مش عشان طيبة يبقى آخد على أفايا .. لأ بعد كدة هاخد حقى بإيدي
قالت سماح بمرح
ماشى يا عم الجامد
سمعا صوت مفتاح فى الباب .. فقالت ياسمين بدهشة
ايه ده .. زوجك
نهضت سماح واستقبلت زوجها على الباب وأخبرته أن ياسمين بصحبتها توجه الى غرفتهما .. عادت سماح لتجد ياسمين تنهض قائله
قالت سماح بأسف
كل مرة بيتأخر فى الشغل .. النهاردة اليوم الوحيد الى جه بدرى عن معاده
قبلتها ياسمين قائله
معلش هجيلك وقت تانى
أوصلتها الى الباب قائله
المهم متحطيش الموضوع فى دماغك وتخلى البتاعه دى تعكنن عليكي
قالت ياسمين
لأ خلاص .. هى حسبي الله ونعم الوكيل فيها وخلاص
ابتسمت قائله
انت وحشتنى أكتر .. مش كنت تقولى انك جاى بدرى
الموبايل فصل شحن معرفتش أكلمك
قبلته على وجنته قائله
طب يا حبيبى ثوانى وأحضر السفرة
تبعها الى المطبخ قائلا
ماشى وأنا هساعدك
ضحكت قائله
ايه الهنا اللى أنا فيه ده
ابتسم قائلا
آه بس متخديش على كده
أخذا يعدان السفرة معا .. وعندما جلسا قال أيمن
ياسمين عاملة ايه دلوقتى
كويسة الحمد لله .. مبسوطه انها خلصت من اللى كان زوجها
صمت قليلا ثم قال
قوليلى يا سماح هو مفيش حاجه كده ولا كده
نظرت اليه قائله
كده ولا كده ازاى يعني
قال بخبث
يعني الأعدة الحريمي اللى كانت بره من شوية دى .. متقالش فيها حاجه متعلقه بان فى حد مثلا هى معجبه بيه
قالت سماحبخبث
لأ بصراحه ماقالتليش حاجه زى كده .. بس أنا حابه أسألك هو فى حد معجب بيها
قال بخبث وهى يعاود تناول طعامه
الله أعلم
تركت الملعقة من يدها ونظرت اليها قائله
أيمن بطل غلاسه بأه لو تعرف حاجه قولهالى
ابتسم لها قائلا
اعرف ايه .. كلى يا بنتى كلى
مش واكله .. فى حاجه انت مخبيها .. ريحنى وقولهالى
هكون مخبي ايه يعني
ليه سألتنى عن ان ياسمين معجبه بحد
عادى يعنى
صاحت پغضب طفولى
لأ مش عادى .. ريحنى بأه
ضحك بشدة قائلا
يا ستير الستات دول عليهم فضول يودى فى داهية
أمسكت سکينة الطعام ورفعتها قائله
قر واعترف أحسنلك
صمت قليلا ثم قال بجديه
طيب هقولك جملة بس متسألينيش عن أى تفاصيل اتفقنا
قالت بجديه مماثله
اتفقنا
أخذ رشفة من كوب الماء الموضوع على جانبه ثم قال
احتمال يبقى فى خطوبة قريب
كتمت انفعالتها .. ونظرت اليه قائله
هسألك سؤال واحد بس
لأ .. قولنا بدون أسئله
صاحب بصوت طفولى
عشان خاطرى يا أيمن .. عشان خطرى .. سؤال واحد بس
قولى يا ستى
نظرت اليه بلهفه قائله
عمر صح
هتف أيمن قائلا
يا سلام .. كدة بأه يبقى ايه التفاصيل اللى أنا مخبيها .. انتى بتستعبطى يا سماح
صفقت بيديها وهتفت فى مرح قائله
يبقى عمر
نظر اليها أيمن بغيظ قائلا
أنا غلطان انى فتحت بقى أصلا
ضحكت سماح قائله
أنا مفيش حاجه تستخبى عليا يا حبيبى
قال لها أيمن بجديه
اوعى تقوليلها حاجه .. سيبي عمر هو اللى يقولها بنفسه بالطريقة اللى هو شايفها
اتسعت ابتسامتها قائله
متخفش هسيبها تتفاجئ .. وأكيد هتبقى أحلى مفاجأة
دخلت ريهام مكتب كرم لتقدم له أحد الفاكسات التى وصلته قبل قليل .. تطلع الى الفاكس وهمت بالإنصراف .. لكنه استوقفها قائلا
لحظة يا آنسه ريهام لو سمحتى
وقفت ريهام .. فوقف ولف حول المكتب وأصبح فى مواجهتها ..بدا مترددا قليلا ثم قال
عايز أسألك عن حاجه شخصية شوية
قالت ببرود
أسفه مش بتكلم فى أمورى الشخصية مع حد
ثم همت ابلإنصراف لكنه
